ખોટા કેસમાં ફસાવી રશિયન સેનામાં કામ કરવા માટે મજબૂર કરાયો; ગુજરાતના યુવકે જણાવી આપવીતી

ગુજરાતના મોરબીના રહેવાસી ભારતીય વિદ્યાર્થી સાહિલ મોહમ્મદ હુસૈને એક વીડિયો સંદેશ દ્વારા લોકોને અપીલ કરી છે કે તેઓ ક્યારેય રશિયન સેનામાં જોડાવાની ભૂલ ના કરે. સાહિલને યુક્રેનિયન સેનાએ પકડી લીધો હતો અને ત્યાંથી તેણે પોતાની આપવીતી વર્ણવી હતી. સાહિલે સમજાવ્યું કે તે સ્ટુડન્ટ વિઝા પર રશિયા ગયો હતો અને અભ્યાસ કરતી વખતે એક કુરિયર કંપનીમાં પાર્ટ-ટાઇમ કામ કરતો હતો.

એનડીટીવી ઇન્ડિયાના અહેવાલ મુજબ સાહિલે કહ્યું કે રશિયન પોલીસે તેને ખોટા ડ્રગ કેસમાં ફસાવ્યો અને પછી તેને બ્લેકમેઇલ કરવાનું શરૂ કર્યું. જો તે રશિયન સેનામાં જોડાય તો તેણે ડ્રગના તમામ આરોપો છોડી દેવાનો વિકલ્પ ઓફર કર્યો. સાહિલે એ પણ ખુલાસો કર્યો કે રશિયામાં ઓછામાં ઓછા 700 લોકો જેલમાં છે જેમને સેનામાં જોડાઈને પોતાનો જીવ જોખમમાં મૂકવાના બદલામાં મુક્તિના વચન સાથે લલચાવીને ફસાવી દેવામાં આવે છે.

સાહિલે જણાવ્યું કે તે મજબૂરીમાં રશિયન પોલીસની ઓફર સ્વીકારવા સંમત થયો. માત્ર 15 દિવસની મૂળભૂત તાલીમ પછી તેને સીધો ફ્રન્ટલાઈનમાં મોકલવામાં આવ્યો. સાહિલે પોતાને બચાવવાની તક મળતા જ યુક્રેનિયન સેના સમક્ષ આત્મસમર્પણ કરી દીધું. હવે સાહિલ ભારત સરકાર અને વડા પ્રધાન નરેન્દ્ર મોદીને અપીલ કરી રહ્યો છે કે તેઓ રશિયન રાષ્ટ્રપતિ વ્લાદિમીર પુતિન સાથે વાત કરે અને તેમના ઘરે સુરક્ષિત પાછા ફરવાની ખાતરી કરે.

આ પણ વાંચો: હવામાં જ એર ઇન્ડિયાની ફ્લાઈટનું એક એન્જીન થયું બંધ, કરાયું ઈમરજન્સી લેન્ડિંગ

સાહિલે યુવાનોને ચેતવણી આપી છે કે રશિયામાં ઘણા છેતરપિંડી કરનારા લોકો સક્રિય છે જે નિર્દોષ લોકોને ફસાવી શકે છે. સાહિલની માતાએ પણ દિલ્હીની કોર્ટમાં તેમના પુત્રને પાછો લાવવા માટે અરજી દાખલ કરી છે, આ કેસની સુનાવણી ફેબ્રુઆરીમાં થવાની છે. ભારતના વિદેશ સચિવ વિક્રમ મિશ્રીએ પણ જણાવ્યું છે કે સરકાર રશિયન સેનામાં છેતરપિંડીથી ભરતી કરાયેલા ભારતીયોને મુક્ત કરવા માટે કામ કરી રહી છે.

વડા પ્રધાન મોદીએ પોતે આ મુદ્દો રાષ્ટ્રપતિ પુતિન સમક્ષ ઉઠાવ્યો છે. તેમણે આગ્રહ કર્યો છે કે આપણા નાગરિકોને શક્ય તેટલી વહેલી તકે મુક્ત કરવામાં આવે. સરકારે ફરી એકવાર ભારતીય નાગરિકોને રશિયન સેનામાં જોડાવાની કોઈપણ ઓફર સ્વીકારવા નહીં અને અત્યંત સાવધાની રાખવા ચેતવણી આપી છે. હાલમાં સાહિલ જેવા ઘણા ભારતીયોના પરિવારો ચિંતિત છે અને તેમના પ્રિયજનોની વાપસી માટે સરકાર પાસેથી સતત મદદ માંગી રહ્યા છે.