ગોધરાકાંડના આરોપીએ બીમાર પિતાનો ઉલ્લેખ કરીને જામીન માંગ્યા, જાણો શું કહ્યું ગુજરાત હાઈકોર્ટે

Godhra Train Burning Case: ગુજરાત હાઈકોર્ટે ગુરુવારે ફારૂક મોહમ્મદ ભાણાની કામચલાઉ જામીન અરજી ફગાવી દીધી હતી. ભાણા ગોધરા ટ્રેન આગમાં સંડોવણી બદલ આજીવન કેદની સજા ભોગવી રહ્યો છે. ફારુક મોહમ્મદ ભાણા 27 ફેબ્રુઆરી, 2002ના ગોધરા ટ્રેન હત્યાકાંડના મુખ્ય કાવતરાખોરોમાંનો એક છે. ગોધરાની ઘટનામાં 59 લોકોના મોત થયા હતા.

ફારુક મોહમ્મદ ભાણાએ ગુજરાત હાઈકોર્ટમાં હંગામી જામીન અરજીની માંગણી કરી હતી. ભાણાએ પોતાની અરજીમાં કહ્યું હતું કે તેના પિતા 95 વર્ષના છે. તે બીમાર છે, આવી સ્થિતિમાં તેણે તેના પિતાની તબીબી સંભાળ રાખવી પડશે.

જસ્ટિસ સંજીવ જે ઠાકુરે જામીન આપવાનો ઇનકાર કર્યો હતો. ઠાકુરે કહ્યું કે તેમના પરિવારમાં અન્ય સભ્યો છે જેઓ તેમના બીમાર પિતાની સંભાળ લઈ શકે છે. કોર્ટે એ પણ નોંધ્યું હતું કે ભાણાને તાજેતરમાં 8 દિવસના સમયગાળા માટે જામીન આપવામાં આવ્યા હતા. આ મુદ્દાઓને ધ્યાનમાં રાખીને કોર્ટે તેની અરજી ફગાવી દીધી હતી.

આ પણ વાંચો : અમરેલીના ખડૂતે પોતાની કારને ફુલોથી શણગારી આપી દીધી 'સમાધિ', કારણ છે ચોંકવનારૂં

કોર્ટે તેના 7 નવેમ્બરના આદેશમાં જણાવ્યું હતું કે જેલના અવલોકનો દર્શાવે છે કે અરજદારને આઈપીસીની કલમ 302 હેઠળના ગુના માટે દોષિત ઠેરવવામાં આવ્યો છે અને તેને આજીવન કેદની સજા કરવામાં આવી છે. અરજદારના પિતાની સંભાળ રાખી શકે તેવા પરિવારના અન્ય સભ્યો છે અને અરજદારને તાજેતરમાં કામચલાઉ જામીન આપવામાં આવ્યા છે તે હકીકતને ધ્યાનમાં લીધા પછી કોઈ મામલો બનતો નથી અને તેથી હાલની અરજી તે મુજબ ફગાવી દેવામાં આવે છે.'

ભાણાના વકીલે જણાવ્યું હતું કે તેમના અસીલ તેમના 95 વર્ષીય પિતાની સારવાર માટે કામચલાઉ જામીન માંગી રહ્યા છે, જેઓ ડાયસ્ટોલિક ડિસફંક્શન અને કિડની સંબંધિત બિમારીથી પીડાય છે.

આ પણ વાંચો: નોટબંધીની આઠમી વર્ષગાંઠ પર રાહુલ ગાંધીએ સરકારને ઘેરી

રાજ્ય સરકાર તરફથી હાજર રહેલા વકીલે ભાણાની અરજીનો વિરોધ કર્યો હતો અને એવી દલીલ કરી હતી કે ભાણાના પિતાની સંભાળ રાખી શકે તેવા અન્ય પરિવારના સભ્યો છે અને તાજેતરમાં ભાણાને 8 દિવસના સમયગાળા માટે જામીન આપવામાં આવ્યા હતા.

ભાણાને 14 વર્ષ સુધી ફરાર રહ્યા બાદ 2016માં એન્ટી ટેરરિઝમ સ્ક્વોડ (ATS) દ્વારા ધરપકડ કરવામાં આવી હતી. તેના પર સાબરમતી એક્સપ્રેસના એસ-6 કોચને સળગાવવા માટે અન્ય સહ-ષડયંત્ર રચવાનો આરોપ હતો.

એટીએસ અધિકારીઓના જણાવ્યા અનુસાર ગોધરામાં કાઉન્સિલર તરીકે કામ કરતો ભાણા તેની ધરપકડ ટાળવા માટે મુંબઈ ભાગી ગયો હતો. તમને જણાવી દઈએ કે, ગોધરા ટ્રેન આગની ઘટનાને કારણે ગુજરાતમાં કોમી રમખાણો ફાટી નીકળ્યા હતા, જેમાં લગભગ 2,000 લોકો માર્યા ગયા હતા.