ગુજરાત ATS એ આતંકી મોડ્યુલનો કર્યો પર્દાફાશ, 4 આતંકવાદીઓની ધરપકડ

Gujarat ATS Nabs 4 Terrorists: ગુજરાત એન્ટી-ટેરરિઝમ સ્ક્વોડ (ATS) એ એક મોટા ઓપરેશનમાં અલ-કાયદાના મોડ્યુલ AQIS (Al-Qaeda in Indian subcontinent)નો પર્દાફાશ કર્યો છે. આ ઓપરેશનમાં ATS એ ચાર શંકાસ્પદ આતંકવાદીઓની ધરપકડ કરી છે. ગુજરાતથી 2, દિલ્હી અને નોઈડામાંથી એક-એકની ધરપકડ કરવામાં આવી છે.

ધરપકડ કરાયેલા ચાર આતંકવાદીઓ 20 થી 25 વર્ષની વય જૂથના છે. એવું જાણવા મળ્યું છે કે આ આતંકવાદીઓને ભારતમાં મોટા ટાર્ગેટ અને મોટા સ્થળો પર હુમલો કરવાની જવાબદારી મળવાની હતી. તપાસમાં જાણવા મળ્યું છે કે આ ચાર આતંકવાદીઓ સોશિયલ મીડિયા એપ્સ દ્વારા એકબીજા સાથે જોડાયેલા હતા. આ ઉપરાંત તેમની ક્રોસ બોર્ડર લિંક્સ પણ સામે આવી છે.

આતંકવાદ વિરોધી એજન્સીએ એક નિવેદનમાં જણાવ્યું હતું કે, "ગુજરાત ATS એ AQIS સાથે જોડાયેલા એક આતંકવાદી મોડ્યુલનો પર્દાફાશ કર્યો છે. આ પ્રતિબંધિત આતંકવાદી સંગઠન સાથે સંકળાયેલા ચાર લોકોની ધરપકડ કરવામાં આવી છે." ATS આ ઓપરેશન વિશે વધુ માહિતી પછીથી આપશે. વર્ષ 2023 માં આ આતંકવાદી સંગઠન સાથે જોડાણ ધરાવતા ચાર બાંગ્લાદેશી નાગરિકોની અમદાવાદના વિવિધ ભાગોમાંથી ધરપકડ કરવામાં આવી હતી.

આ પણ વાંચો: ઇન્ડિગોની અમદાવાદ-દીવ ફ્લાઇટમાં ટેકનિકલ ખામી સર્જાઈ, ફ્લાઇટ રદ

અલ-કાયદાને વિશ્વના સૌથી ખતરનાક આતંકવાદી જૂથોમાંનો એક માનવામાં આવે છે. સંયુક્ત રાષ્ટ્ર, નાટો, યુરોપિયન યુનિયન, યુનાઇટેડ સ્ટેટ્સ, ભારત, રશિયા અને અન્ય ઘણા દેશો દ્વારા તેને આતંકવાદી જૂથ જાહેર કરવામાં આવ્યું છે. તેની સ્થાપના 1988 માં ઓસામા બિન લાદેન, અબ્દુલ્લા આઝમ અને અન્ય લોકો દ્વારા કરવામાં આવી હતી. આ સંગઠનની રચના સોવિયેત યુનિયનના અફઘાનિસ્તાન પર આક્રમણનો વિરોધ કરતા લડવૈયાઓને ટેકો આપવા માટે કરવામાં આવી હતી.