"ધર્મ પરિવર્તનનો ભોગ બનેલા લોકો સામે પણ કાર્યવાહી થઈ શકે છે જો તેઓ…" ગુજરાત હાઈકોર્ટનું કડક અવલોકન

ગુજરાત હાઈકોર્ટે જણાવ્યું છે કે જો કોઈ વ્યક્તિ ધાર્મિક પરિવર્તનનો "પીડિત" હોવાનો દાવો કરે છે પરંતુ બાદમાં અન્ય લોકોને ધર્મ પરિવર્તન માટે દબાણ કરે છે, તો તેમની સામે કાયદેસરની કાર્યવાહી થઈ શકે છે. જસ્ટિસ નીરજ દેસાઈની કોર્ટે 1 ઓક્ટોબરના રોજ અનેક અરજીઓ ફગાવી દીધી હતી, જેમાં આ અવલોકન કરવામાં આવ્યું હતું. કોર્ટે જણાવ્યું હતું કે જ્યારે કોઈ અન્ય લોકોને ધર્મ પરિવર્તન માટે દબાણ કરે છે અથવા પ્રેરે છે ત્યારે તે પણ ગુનાની શ્રેણીમાં આવે છે.

પીડિતોએ અન્ય લોકોને ધર્મ પરિવર્તન માટે દબાણ કર્યું હતું

અરજદારોએ જણાવ્યું હતું કે તેઓ મૂળ હિન્દુ હતા અને અન્ય લોકોના દબાણ હેઠળ ઇસ્લામ ધર્મ અપનાવ્યો હતો. તેથી તેઓ પીડિત છે, આરોપી નથી. જોકે કોર્ટે શોધી કાઢ્યું કે તેઓએ પછીથી અન્ય લોકોને ધર્મ પરિવર્તન માટે પ્રભાવિત કર્યા અને દબાણ કર્યું હતું.

આખો મામલો શું છે?

આ કેસ ભરૂચ જિલ્લાના આમોદ પોલીસ સ્ટેશનનો છે. FIRમાં આરોપ મૂકવામાં આવ્યો છે કે ત્રણ વ્યક્તિઓએ આશરે 37 હિન્દુ પરિવારોના 100 થી વધુ લોકોને લાલચ આપીને ઇસ્લામ ધર્મ અપનાવડાવ્યો. જ્યારે એક વ્યક્તિએ વિરોધ કર્યો ત્યારે તેને ધમકી આપવામાં આવી હતી, જેના પગલે તેણે પોલીસ ફરિયાદ નોંધાવી હતી.

આ પણ વાંચો: પાકિસ્તાની પ્રેમીપંખીડા 40 કિલોમીટર પગપાળા સરહદ પાર કરીને ભારતમાં ઘૂસી ગયા

એક વિદેશી નાગરિક પર ધર્માંતરણ માટે ભંડોળ પૂરું પાડવાનો આરોપ

વધુમાં એક વિદેશી નાગરિક પર ધર્માંતરણ માટે ભંડોળ પૂરું પાડવાનો આરોપ છે. કોર્ટે તેના કેસમાં પણ રાહત આપવાનો ઇનકાર કર્યો હતો. કોર્ટે નોંધ્યું હતું કે તે ઘણી વખત ભારતની મુલાકાત લઈ ચૂક્યો છે અને તપાસમાં સહકાર આપી રહ્યો નથી. આ કેસ ભારતીય દંડ સંહિતાની કલમ 120B (ષડયંત્ર), 153B (સમુદાય વચ્ચે દુશ્મનાવટને પ્રોત્સાહન આપવું) અને 295A (ધાર્મિક લાગણીઓને ઠેસ પહોંચાડવાના હેતુથી કૃત્યો) હેઠળ નોંધવામાં આવ્યો છે.