સાબરમતી નદીના કિનારે આવેલા ગામોમાં પૂરની સંભાવના, સુભાષ બ્રિજ નજીકના વિસ્તારોમાં એલર્ટ જાહેર

અમદાવાદ સિંચાઈ વિભાગે સોમવારે બપોરે સુભાષ બ્રિજ નજીક સાબરમતી નદીની આસપાસના વિસ્તારોમાં ધરોઈ ડેમ અને વાસણા બેરેજમાંથી પાણી છોડવામાં આવતા એલર્ટ જાહેર કર્યું હતું. રવિવારે ભારે વરસાદને કારણે સાબરમતી રિવરફ્રન્ટનો વોકવે જાહેર જનતા માટે બંધ છે. નદીમાં પાણી છોડવામાં આવ્યા પછી રિવરફ્રન્ટમાં ઘણા સાપ તરતા જોવા મળ્યા હતા, અને સ્થાનિક એજન્સીઓએ કેટલાકનું રેસ્ક્યૂ કર્યું હતું.

ઉપરાંત સાબરમતી નદીના કિનારે આવેલા ગામોમાં પૂર આવવાની સંભાવના છે, તેમને એલર્ટ પર રાખવામાં આવ્યા છે અને અધિકારીઓને યોગ્ય સલામતીના પગલાં લેવા કહેવામાં આવ્યું છે. સાબરમતી નદી પર સ્થિત ધરોઈ ડેમ સત્તાધીસો પાસેથી મળેલી માહિતી અનુસાર, સોમવારે બપોરે 12 વાગ્યે ધરોઈ ડેમનું સ્તર 188.68 મીટર હતું.

સિંચાઈ વિભાગ તરફથી ચેતવણી આપવામાં આવી છે કે, "ધરોઈ ડેમમાં પાણીનું સ્તર 88.52 ટકા હોવાથી આગામી એક કલાકથી, ધરોઈ ડેમમાંથી સાબરમતી નદીના નીચાણવાળા વિસ્તારોમાં 107248 ક્યુસેક પાણી છોડવામાં આવી રહ્યું છે, જે ધીમે ધીમે વધી શકે છે. ધરોઈ ડેમમાંથી હાલમાં છોડવામાં આવી રહેલ પાણીનો જથ્થો લગભગ 10 થી 12 કલાક પછી સુભાષબ્રિજ સુધી પહોંચવાની શક્યતા છે. આને ધ્યાનમાં રાખીને સુભાષબ્રિજ પરથી એલર્ટ જારી કરવામાં આવ્યું છે".

ઉપરાંત સાબરમતી નદી પર સ્થિત સંત સરોવર ડેમમાંથી પ્રાપ્ત માહિતી અનુસાર, હાલમાં ડેમના ડાઉનસ્ટ્રીમમાં સાબરમતી નદીમાં 27,282 ક્યુસેક પાણી છોડવામાં આવી રહ્યું છે. હાલમાં વાસણા બેરેજમાંથી સાબરમતી નદીમાં 30,836 ક્યુસેક પાણી છોડવામાં આવી રહ્યું છે, અને આ પ્રવાહ ધીમે ધીમે વધશે. બેરેજના 25 દરવાજા 6 ફૂટ સુધી ખોલવામાં આવ્યા છે.

આ પણ વાંચો: સિંધુ જળ સંધિ સ્થગિત થઈ ગઈ છતા ભારતે પાકિસ્તાનને મદદ કરી, મોટું નુકસાન થતા બચાવ્યું

ધરોઈ ડેમ અને વાસણા બેરેજમાંથી સાબરમતી નદીમાં પાણીના પ્રવાહમાં નોંધપાત્ર વધારાને ધ્યાનમાં રાખીને સાબરમતી રિવરફ્રન્ટ ડેવલપમેન્ટ કોર્પોરેશન લિમિટેડ (SRFDCL) એ ચાલુ પ્રોજેક્ટ્સમાં સામેલ તમામ કોન્ટ્રાક્ટરો અને એજન્સીઓને સૂચિત કર્યા છે. આમાં રિવરફ્રન્ટ ડેવલપમેન્ટનો બીજો તબક્કો નેશનલ હાઇ સ્પીડ રેલ કોર્પોરેશન લિમિટેડનો બુલેટ ટ્રેન પ્રોજેક્ટ, તેમજ રિવરફ્રન્ટના બોટિંગ અને ફ્લોટિંગ રેસ્ટોરન્ટનું સંચાલન કરતી એજન્સીઓ, સુરક્ષા અને પોલીસ વહીવટનો સમાવેશ થાય છે. દરમિયાન હવામાન ચેતવણીઓને કારણે માછીમારોને 28 ઓગસ્ટ સુધી દરિયામાં ન જવાની સલાહ આપવામાં આવી છે.

ભારતીય હવામાન વિભાગ (IMD) એ મંગળવારે સૌરાષ્ટ્ર અને કચ્છના કેટલાક વિસ્તારોમાં તેમજ ગુજરાતના અન્ય જિલ્લાઓમાં ભારેથી અતિ ભારે વરસાદની આગાહી કરી છે. ઉપરાંત, મધ્ય અને દક્ષિણ ગુજરાતમાં ભારે વરસાદ પડવાની ધારણા છે. સાવચેતી રૂપે, માછીમારોને ચેતવણીનો સમયગાળો પૂરો ન થાય ત્યાં સુધી દરિયાથી દૂર રહેવાની વિનંતી કરવામાં આવી છે.

ગુજરાતમાં મોસમી સરેરાશ વરસાદના 84 ટકા વરસાદ નોંધાયો છે

ગાંધીનગર સ્થિત સ્ટેટ ઇમરજન્સી ઓપરેશન સેન્ટર અનુસાર, સોમવાર સુધીમાં રાજ્યમાં મોસમનો કુલ સરેરાશ વરસાદ 84 ટકાથી વધુ છે. છેલ્લા 24 કલાક દરમિયાન છોટા ઉદેપુર જિલ્લાના સંખેડા તાલુકામાં રાજ્યમાં સૌથી વધુ 4 ઇંચ વરસાદ નોંધાયો છે.

આ ઉપરાંત સુરત જિલ્લાના ઉમરપાડા તાલુકામાં 3.90 ઇંચ, સાબરકાંઠાના ઇડરમાં 3.86 ઇંચ, તાપીના વ્યારામાં 3.54 ઇંચ અને વડોદરાના ડભોઇમાં 3.15 ઇંચ વરસાદ નોંધાયો છે. આ ઉપરાંત સોમવારે સવારે 6 વાગ્યાથી સવારે 10 વાગ્યા સુધી માત્ર ચાર કલાકમાં મહિસાગરના બાલાસિનોર તાલુકા અને સાબરકાંઠાના વિજયનગર તાલુકામાં 2.13 ઇંચ વરસાદ નોંધાયો છે.

આ પણ વાંચો: ભારત-અમેરિકા વચ્ચે વધી રહેલા વેપાર તણાવ વચ્ચે PM મોદીનો મોટો સંદેશ

હાલમાં સરદાર સરોવર ડેમ 84 ટકાથી વધુ ભરાઈ ગયો છે. રાજ્યમાં 67 ડેમ 100 ટકાથી વધુ ભરાઈ ગયા છે, જ્યારે 27 ડેમ 90 ટકાથી 100 ટકાની વચ્ચે ભરાઈ ગયા છે. કુલ 94 ડેમ હાઈ એલર્ટ પર છે, અને 19 ડેમ ચેતવણી હેઠળ છે.

25 ઓગસ્ટ સુધીમાં રાજ્યમાં કુલ મોસમી સરેરાશ વરસાદના 84 ટકાથી વધુ વરસાદ નોંધાયો છે. સૌથી વધુ વરસાદ ઉત્તર ગુજરાત ઝોનમાં 87.43 ટકા, ત્યારબાદ દક્ષિણ ગુજરાતમાં 86.41 ટકા, કચ્છ ક્ષેત્રમાં 85.08 ટકા, સૌરાષ્ટ્ર ઝોનમાં 83.51 ટકા અને પૂર્વ મધ્ય ઝોનમાં સૌથી ઓછો 79.08 ટકા વરસાદ નોંધાયો છે.