VIDEO: ડાંગ ખાતે પ્રવાસીઓની મજા બની ગઈ સજા, ભીગુ ધોધમાં અચાનકથી વધ્યો પાણીનો પ્રવાહ અને...

Dang Viral Video: ડાંગ જિલ્લામાંથી એક હૃદયદ્રાવક વીડિયો સામે આવ્યો છે. વીડિયોમાં ઘણા પ્રવાસીઓ ધોધના જોરદાર પ્રવાહ વચ્ચે ફસાયેલા જોવા મળે છે. જિલ્લાના ભીગુના ધોધમાં અચાનક પાણીનો જોરદાર પ્રવાહ આવ્યો હતો અને પૂર જેવી સ્થિતિ સર્જાઈ હતી. આ દરમિયાન ત્યાં ઘણા પ્રવાસીઓ હાજર હતા જે અચાનક પાણીના જોરદાર પ્રવાહમાં ફસાઈ ગયા હતા. પરંતુ બધા લોકોએ પોતાની બુદ્ધિથી એકબીજાના જીવ બચાવ્યા, જેનો વીડિયો સોશિયલ મીડિયા પર વાયરલ થઈ રહ્યો છે.

આ દિવસોમાં ડાંગ જિલ્લામાં ઘણા ધોધમાં પાણીનો પ્રવાહ ખૂબ જ ઝડપી બન્યો છે. જેના કારણે ભીગુ ધોધની સુંદરતા જોવા આવેલા ઘણા પ્રવાસીઓ ફસાઈ ગયા. ધોધમાં ફસાયેલા પ્રવાસીઓનો વીડિયો સોશિયલ મીડિયા પર વાયરલ થઈ રહ્યો છે. વીડિયોમાં લોકો એકબીજાના હાથ પકડીને માનવ સાંકળ બનાવીને એકબીજાને બચાવતા જોવા મળી રહ્યા છે.

ભારે વરસાદ અને પૂરને કારણે વહીવટીતંત્રે લોકોને સતર્ક રહેવાની સૂચના આપી હતી. પરંતુ જ્યારે પાણીના ઝડપી પ્રવાહમાં લોકોના ફસાયેલા હોવાના વીડિયો સામે આવ્યા ત્યારે સુરક્ષા વ્યવસ્થા પર પ્રશ્નો ઉભા થયા છે. ભીગુ ધોધ જંગલની અંદર આવેલો છે, જ્યાં લોકો ઘણીવાર તેની સુંદરતા જોવા માટે આવે છે. ત્યાં પહોંચવા માટે ટ્રેકિંગ પણ જરૂરી છે. આવામાં લોકો લપસણા રસ્તાઓમાંથી પસાર થાય છે.