Gujarat Weather Update: હવામાન વિભાગની આગાહી મુજબ, રાજ્યમાં આગામી 5 દિવસ સુધી તાપમાન એકસમાન રહેવાનું અનુમાન છે. રાજ્યમાં શીત લહેરની સ્થિતિ જોવા મળી રહી છે અને દક્ષિણ-પૂર્વ દિશાના પવનો ફૂંકાઈ રહ્યા છે. અમદાવાદનું લઘુત્તમ તાપમાન 16 ડિગ્રીથી નીચે જઈ શકે છે.
ગુજરાતના ઘણા વિસ્તારોમાં વરસાદની આગાહી
ત્યાં જ હવામાન નિષ્ણાત અંબાલાલ પટેલની આગાહી પ્રમાણે, 22 જાન્યુઆરી પછી રાજ્યમાં હવામાન બદલાઈ શકે છે. 22 જાન્યુઆરીથી 24 જાન્યુઆરી સુધી ગુજરાતના ઘણા વિસ્તારોમાં વાદળછાયું વાતાવરણ રહેવાની ધારણા છે. કેટલાક જિલ્લાઓમાં વરસાદની શક્યતા પણ વ્યક્ત કરવામાં આવી છે. 24 જાન્યુઆરીથી રાજ્યમાં ઠંડા પવનો ફૂંકાશે તેવી આગાહી કરવામાં આવી છે.
આ પણ વાંચો: અમદાવાદના આ હેવી ટ્રાફિક રોડ પર બનશે ફ્લાયઓવર, હાઈકોર્ટે આપી લીલી ઝંડી
રાજ્યમાં હવામાન કેવું રહેશે?
હવામાન વિભાગની આગાહી મુજબ, અમરેલી, આણંદ, અરવલ્લી, ગાંધીનગર, રાજકોટ, સાબરકાંઠા, સુરેન્દ્રનગર સહિતના જિલ્લાઓમાં લઘુત્તમ તાપમાન 16 ડિગ્રી રહેવાની શક્યતા છે. ગીર સોમનાથ, નવસારી, વલસાડ સહિતના જિલ્લાઓમાં લઘુત્તમ તાપમાન 19 ડિગ્રી રહેવાની શક્યતા છે. આ ઉપરાંત બનાસકાંઠા, દાહોદ, જામનગર, મહિસાગર, મોરબી, પાટણ, મહેસાણા સહિતના જિલ્લાઓમાં લઘુત્તમ તાપમાન 15 ડિગ્રી રહેવાની શક્યતા છે. ગુજરાત રાજ્યમાં હજુ પણ ઠંડીનો પ્રકોપ ચાલુ રહેશે. ઉત્તર-પૂર્વીય પવન ઠંડો ફૂંકાઈ રહ્યો છે. આ સાથે વેસ્ટર્ન ડિસ્ટર્બન્સના કારણે પવન ફૂંકાઈ રહ્યો છે.
તમામ શહેરોનું તાપમાન
ગુજરાતના તમામ શહેરોના તાપમાનની વાત કરીએ તો અમદાવાદમાં 17.5 ડિગ્રી, અમરેલીમાં 15.0 ડિગ્રી, વડોદરામાં 19.02 ડિગ્રી, ભુજમાં 13.03 ડિગ્રી, ડીસામાં 15.4 ડિગ્રી, દીવમાં 15.2 ડિગ્રી, કંડલામાં 15.5 ડિગ્રી, નલિયા 1.5, પોરબંદરમાં 13.4 ડિગ્રી અને સુરતમાં 18.8 ડિગ્રી તાપમાન નોંધાયું હતું.
