Karnataka Exit Poll Result : કર્ણાટક વિધાનસભા ચૂંટણી : 2018માં કેવા રહ્યા હતા એક્ઝિટ પોલના તારણો, જાણો

Karnataka Assembly Election 2023, Exit Poll Result : કર્ણાટક વિધાનસભા ચૂંટણીમાં આજે (10 મે) મતદાન પુરું થતા જ અલગ-અલગ એજન્સીઓ અને ટીવી ચેનલો દ્વારા એક્ઝિટ પોલ જાહેર કરવામાં આવશે. આ એક્ઝિટ પોલથી અંદાજો લગાવી શકાય કે રાજ્યમાં કોની સરકાર બનવા જઈ રહી છે. જોકે એક્ઝિટ પોલના તારણો પર સવાલો પણ ઘણા ઉઠી રહ્યા છે. 2018માં એક્ઝિટ પોલનો કેવો અંદાજ હતો અને અને શું પરિણામ આવ્યા હતા તે વિશે જણાવી રહ્યા છીએ.

કર્ણાટક વિધાનસભા ચૂંટણીમાં 2018માં આવા હતા એક્ઝિટ પોલ

રિપબ્લિક ટીવી-જન કી વાતના એક્ઝિટ પોલમાં ભાજપને બહુમત આપવામાં આવી હતી. 224 વિધાનસભા સીટોમાંથી ભાજપને 94 થી 114 સીટો આપી હતી. કોંગ્રેસને 73 થી 82 સીટો પર જીત મેળવશે તેવો અંદાજો વ્યક્ત કર્યો હતો. જેડીએસ ગઠબંધનને 32 થી 43 સીટો મળવાનો અંદાજ આપ્યો હતો.

ન્યૂઝ એક્સ અને સીએનએક્સના એક્ઝિટ પોલ પ્રમાણે ભાજપને સૌથી મોટી પાર્ટી બતાવવામાં આવી હતી. ભાજપને 102થી 110 સીટો મળવાની સંભાવના વ્યક્ત કરી હતી. કોંગ્રેસ 72 થી 78 સીટ સાથે બીજા નંબરે અને જેડીએસ ગંઠબંધન 35 થી 39 સીટો સાથે ત્રીજા નંબરે રહે તેવો અંદાજ વ્યક્ત કર્યો હતો.

આજતક-એક્સિસ એક્ઝિટ પોલના મતે પ્રદેશમાં કોંગ્રેસની સરકાર બનશે તેનો દાવો કરાયો હતો. કોંગ્રેસને સૌથી વધારે 106 થી 118 સીટો મળશે તેમ દર્શાવ્યું હતું. ભાજપને 79 થી 92 સીટો મળવાનો દાવો કર્યો હતો. જેડીએસ ગંઠબંધન 22 થી 30 સીટો સાથે ત્રીજા નંબરે રહેશે તેવી સંભાવના વ્યક્ત કરી હતી.

આ પણ વાંચો - એક કે બે નહીં, પૂરા 11 સીએમ દાવેદારો! કર્ણાટકમાં ભાજપ-કોંગ્રેસ માટે આસાન નહીં રહે આ નિર્ણય

એબીપી-સી વોટરના એક્ઝિટ પોલ પ્રમાણે ભાજપને સૌથી વધારે સીટો મળવાની ધારણા હતી. આ પોલમાં ભાજપને 110 સીટો આપી હતી. કોંગ્રેસના ફાળે 88 સીટો અને જેડીએસના ખાતામાં 24 સીટો જશે તેવો અંદાજો વ્યક્ત કર્યો હતો.

ટાઇમ્સ નાઉ અને વીએમઆર એક્ઝિટ પોલે કર્ણાટકમાં ત્રિશંકુ વિધાનસભા બનશે તેવો દાવો વ્યક્ત કર્યો હતો. આ સર્વેમાં કોંગ્રેસના ખાતામાં 97, ભાજપને 97 અને જેડીએસને 35 સીટો મળશે તેવો અંદાજ વ્યક્ત કર્યો હતો.

2018માં શું આવ્યું હતું પરિણામ

કર્ણાટક વિધાનસભા ચૂંટણી 2018ના પરિણામ 15 મે ના રોજ જાહેર કરવામાં આવ્યા હતા. જેમાં ભારતીય જનતા પાર્ટી 104 સીટો સાથે સૌથી મોટી પાર્ટી બનીને સામે આવી હતી. કોંગ્રેસને 80 સીટો, જેડીએસને 37 અને અન્યને 1 સીટ મળી હતી. એક્ઝિટ પોલના અંદાજ પ્રમાણે ત્રિશુંક વિધાનસભા બની હતી. આ પછી કોંગ્રેસ અને જેડીએસે સાથે મળીને સરકાર બનાવી હતી.