ભાજપે 2024ની બ્લુપ્રિન્ટ કરી તૈયાર : PM મોદીની 100 રેલીઓ... હવે દક્ષિણ રાજ્યો, બંગાળ, ઓડિશા પર ખાસ ફોકસ

લીઝ મેથ્યુ : ભારતીય જનતા પાર્ટીએ આગામી વર્ષે લોકસભા ચૂંટણી માટે તેની તૈયારીઓની બ્લુ પ્રિન્ટ તૈયાર કરી છે. પાર્ટીએ દક્ષિણના રાજ્યો ઓડિશા અને પશ્ચિમ બંગાળ પર ધ્યાન કેન્દ્રિત કર્યું છે. વડા પ્રધાન નરેન્દ્ર મોદી વર્ષના અંતમાં ઓછામાં ઓછી 100 રેલીઓ કરશે અને આ રાજ્યોમાં મોટા પ્રોજેક્ટ્સની જાહેરાત કરશે જ્યાં પાર્ટી તેની પહોંચ વિસ્તારવા માંગે છે. પાર્ટીના આંતરિક સૂત્રોએ કહ્યું છે કે, 2024ની લોકસભા ચૂંટણી માટે ભાજપની બ્લૂ પ્રિન્ટ લગભગ તૈયાર છે.

ઘણા રાજ્યોમાં મેગા પ્રોજેક્ટની જાહેરાત કરવામાં આવશે

સૂત્રોએ જણાવ્યું હતું કે, વડા પ્રધાન મોદી વર્ષના અંત સુધીમાં નવા કાર્યક્રમો શરૂ કરવા અને પ્રોજેક્ટ્સનું ઉદ્ઘાટન કરવા જશે અને રેલીઓને સંબોધિત કરશે. તેમણે એમ પણ કહ્યું કે, કેન્દ્ર સરકાર એવા રાજ્યોમાં મેગા પ્રોજેક્ટ્સ અને ખર્ચની જાહેરાત કરશે, જ્યાં ભાજપ તેની પહોંચ વધારવા માટે સંઘર્ષ કરી રહ્યું છે.

ભાજપે મહિલાઓ અને લઘુમતીઓ માટે પગલાં લેવાનું શરૂ કરી દીધું છે. જેમાં મહિલા મોરચાને મહિલા લાભાર્થીઓ સુધી પહોંચવાનું અને તેમના માટેની કેન્દ્રીય યોજનાઓ પર આક્રમક રીતે ઝુંબેશ કરવાનું કામ સોંપવામાં આવ્યું છે. તો, લઘુમતી મોરચાએ 10 રાજ્યો અને એક કેન્દ્રશાસિત પ્રદેશમાં લગભગ 60 લોકસભા મતવિસ્તારોની યાદી તૈયાર કરી છે, જ્યાં લઘુમતીઓની સંખ્યા વસ્તીના 30 ટકા છે.

ત્રણ સભ્યોની સમિતિની રચના

પાર્ટીના એક કાર્યકર્તાએ જણાવ્યું કે, ભાજપના રાષ્ટ્રીય અધ્યક્ષ જેપી નડ્ડાએ લોકસભા ચૂંટણીની રણનીતિને અંતિમ સ્વરૂપ આપવા માટે એક સમિતિની રચના કરી છે. વરિષ્ઠ નેતાઓ સુનીલ બંસલ, વિનોદ તાવડે અને તરુણ ચુગની ત્રણ સભ્યોની પેનલ વિવિધ મોરચા અને ધારાસભ્યો દ્વારા આયોજિત કાર્યક્રમો પર નજર રાખશે. સમિતિ એ પણ નોંધશે કે, જો કાર્યક્રમોમાં કેટલાક ફેરફારોની જરૂર પડશે, તો તેના માટે સૂચનો આપવામાં આવશે. આ સમિતિ સમગ્ર દેખરેખનો હવાલો સંભાળશે, જેમાં પક્ષના વરિષ્ઠ નેતાઓ અને મંત્રીઓને વ્યક્તિગત રાજ્યોનો હવાલો આપવામાં આવશે. ભાજપના એક કાર્યકર્તાએ જણાવ્યું હતું કે, કોઈ પણ મુદ્દાને અવગણવામાં ન આવે તે સુનિશ્ચિત કરવા માટે તૈયારીઓ પર વિવિધ સ્તરે દેખરેખ રાખવામાં આવશે. "દક્ષિણ રાજ્યો, ઓડિશા અને પશ્ચિમ બંગાળ જેવા રાજ્યો પર વિશેષ ધ્યાન આપવામાં આવશે."

આ રાજ્યો પર વિશેષ ધ્યાન આપવામાં આવશે

નેતાએ કહ્યું, જ્યારે ભાજપ મધ્યપ્રદેશ જેવા રાજ્યમાં તેના સંગઠનને મજબૂત કરવા પર ધ્યાન કેન્દ્રિત કરી રહ્યું છે, જ્યાં ચૂંટણીમાં વર્ચસ્વ સુનિશ્ચિત કરવા માટે મજબૂત પાર્ટી માળખું અપેક્ષિત છે, ત્યારે તેલંગાણા માટે પાર્ટીની વ્યૂહરચના અલગ રહી છે. સૂત્રોએ જણાવ્યું કે, પાર્ટી નેતૃત્વ તમિલનાડુ, તેલંગાણા, આંધ્રપ્રદેશ અને કેરળમાં વધુ બેઠકો જીતવા માટે મક્કમ છે. "ભાજપે ઓડિશા અને પશ્ચિમ બંગાળ જેવા પૂર્વીય રાજ્યોમાં લોકસભાની ચૂંટણીમાં તેનો ફાયદો વિસ્તારવો પડશે, અહીં વ્યૂહરચના અલગ હશે."

કેરળ માટે પાર્ટીની અલગ રણનીતિ હશે. ડાબેરીઓ અને કોંગ્રેસને હરાવવા મંત્રીઓ સહિત કેન્દ્રીય નેતાઓ દ્વારા જાહેર કાર્યક્રમોની સંખ્યા વધારવાના પ્રયાસો કરવામાં આવશે. સૂત્રોના જણાવ્યા અનુસાર, કેન્દ્ર સરકાર કેરળમાં નવા પ્રોજેક્ટની જાહેરાત કરી શકે છે.

આ પણ વાંચો - જર્મન વિદેશ મંત્રી માટે રેડ કાર્પેટ ન હોવા પર વિવાદ: પ્રોટોકોલ શું છે, તે દિવસે શું થયું?

ત્રિપુરા અને નાગાલેન્ડમાં જીત બાદ ગયા અઠવાડિયે બીજેપી હેડક્વાર્ટર ખાતે વિજય રેલીને સંબોધતા પીએમ મોદીએ કહ્યું કે, પૂર્વોત્તરમાં ભાજપની ફરીથી જીતે પાર્ટી ખ્રિસ્તી વિરોધી હોવાના આરોપોને નકારી કાઢ્યા છે. તેમણે જાહેર કર્યું કે, ભાજપ ગઠબંધન કેરળમાં સત્તામાં આવશે, લોકોને સમજાઈ ગયું છે કે, ડાબેરીઓ અને કોંગ્રેસે રાજ્યને લૂંટવા માટે હાથ મિલાવ્યા છે.