Madhya Pradesh Election : મધ્યપ્રદેશ વિધાનસભા ચૂંટણીમાં કોણ જીતશે? આ એક એવો પ્રશ્ન છે જે દરેક વ્યૂહરચનાકાર કે ચૂંટણીમાં રસ ધરાવનાર વ્યક્તિના મનમાં ઊઠતો જ હશે. પરંતુ આ બધાની વચ્ચે ઈન્ડિયા ટીવી-સીએનએક્સ ઓપિનિયન પોલના સર્વેમાં મોટો દાવો કરવામાં આવ્યો છે. સર્વેમાં દાવો કરવામાં આવ્યો છે કે આ વખતે મધ્યપ્રદેશ વિધાનસભા ચૂંટણીમાં ભારતીય જનતા પાર્ટી 230 બેઠકોમાંથી 119 બેઠકો સાથે સ્પષ્ટ બહુમતી મેળવી શકે છે. મધ્યપ્રદેશમાં 17 નવેમ્બરે મતદાન થશે અને 3 ડિસેમ્બરે પરિણામ જાહેર થશે.
ઓપિનિયન પોલ અનુસાર, ભાજપ 119 બેઠકો જીતી શકે છે, જ્યારે પાંચ વર્ષ પહેલા 230 સભ્યોની વિધાનસભામાં તેણે 109 બેઠકો જીતી હતી. સર્વેમાં કહેવામાં આવ્યું છે કે મુખ્ય વિપક્ષી પાર્ટી કોંગ્રેસ 107 સીટો જીતી શકે છે, જ્યારે પાંચ વર્ષ પહેલા તેને 114 સીટો મળી હતી. અપક્ષ સહિત ‘અન્ય’ ચાર બેઠકો જીતે તેવી શક્યતા છે. છેલ્લી ચૂંટણીમાં સાત બેઠકો અપક્ષ અને સ્થાનિક પક્ષોએ જીતી હતી.
ઓપિનિયન પોલમાં વોટ શેરના અંદાજ મુજબ ભાજપને 46.33 ટકા વોટ, કોંગ્રેસને 43.24 ટકા વોટ અને અન્યને 10.43 ટકા વોટ મળી શકે છે. 2018ની ચૂંટણીમાં ભાજપને 41.02 ટકા, કોંગ્રેસને 40.89 ટકા અને અન્યને 18.09 ટકા વોટ મળ્યા હતા.
પ્રદેશ મુજબ બેઠકનો અંદાજ
ઈન્ડિયા ટીવી-સીએનએક્સ પોલમાં પ્રદેશ મુજબની બેઠકોના અંદાજ નીચે મુજબ છે –
- 51 બેઠકો ધરાવતા બઘેલખંડમાં ભાજપને 29 બેઠકો, કોંગ્રેસને 21 બેઠકો અને ‘અન્ય’ને એક બેઠક મળી શકે છે.
- 24 બેઠકો ધરાવતા ભોપાલમાં ભાજપ 16 બેઠકો જીતી શકે છે અને બાકીની 8 બેઠકો કોંગ્રેસને મળી શકે છે.
- 34 બેઠકો ધરાવતા ચંબલમાં કોંગ્રેસ 19 બેઠકો જીતી શકે છે, જ્યારે ભાજપને 15 બેઠકો મળી શકે છે.
- 47 સીટવાળા મહાકૌશલમાં કોંગ્રેસને 26 સીટો, બીજેપીને 19 સીટો અને અન્યને બે સીટો મળી શકે છે.
- 46 બેઠકો ધરાવતા માલવામાં ભાજપને 28 અને કોંગ્રેસને 18 બેઠકો મળી શકે છે.
- 28 બેઠકો ધરાવતા નિમારમાં કોંગ્રેસ 15 બેઠકો, ભાજપ 12 બેઠકો જીતી શકે છે અને બાકીની એક બેઠક ‘અન્ય’ના ખાતામાં જઈ શકે છે.
મુખ્યમંત્રીની રેસમાં કોણ આગળ?
ઓપિનિયન પોલમાં 42.5 ટકા મતદારોએ શિવરાજ સિંહ ચૌહાણને પસંદ કર્યા અને 39.61 ટકા લોકોએ કમલનાથને મુખ્યમંત્રી પદ માટે પસંદ કર્યા. 11.47 ટકા લોકોએ જ્યોતિરાદિત્ય સિંધિયાને પસંદ કર્યું, એક ટકાને દિગ્વિજય સિંહ અને બાકીના 5.42 ટકા લોકોએ અન્ય નેતાઓને પસંદ કર્યા.
ઓપિનિયન પોલના કેટલાક અન્ય પરિણામો-
52.39 ટકા બીજેપી સમર્થકોએ કહ્યું કે તેઓ નરેન્દ્ર મોદીના ચહેરા પર વોટ કરશે, જ્યારે 42.06 ટકાએ કહ્યું કે તેઓ શિવરાજ સિંહ ચૌહાણના ચહેરાને વોટ કરશે. 5.55 ટકાનો કોઈ અભિપ્રાય નહોતો. આ સવાલ ભાજપના સમર્થકોને જ પૂછવામાં આવ્યો હતો.
48.77 ટકા મતદારોએ કહ્યું કે ભાજપે ઉમેદવારોની પસંદગીમાં ડહાપણ બતાવ્યું છે, જ્યારે 39.52 ટકા લોકોએ કહ્યું કે કોંગ્રેસે પણ ઉમેદવારોની પસંદગીમાં ડહાપણ બતાવ્યું છે.
35.06 ટકા મતદારોએ કહ્યું કે તેઓ કોંગ્રેસના નેતાઓમાં રાહુલ ગાંધીના ચૂંટણી પ્રચારને પસંદ કરે છે, જ્યારે 34.85 ટકાએ કહ્યું કે તેઓ કમલનાથને પસંદ કરે છે. 13.5 ટકા લોકોએ પ્રિયંકા ગાંધીને પસંદ કર્યા.
47.01 ટકા મતદારોએ કહ્યું કે તેઓ ભાજપની કલ્યાણ યોજનાઓ (ગેરંટી) પર વિશ્વાસ કરે છે, જ્યારે 40.66 ટકા કોંગ્રેસ પર વિશ્વાસ કરે છે.
46.99 ટકા મતદારોએ કહ્યું કે કોંગ્રેસ પાર્ટીનું જાતિ આધારિત વસ્તીગણતરીનું વચન માત્ર એક ચૂંટણી યુક્તિ છે, જ્યારે 42.18 ટકા મતદારોએ કહ્યું કે તે એક વાસ્તવિક પહેલ છે. 10.83 ટકાનો કોઈ અભિપ્રાય નહોતો.
52.91 ટકા મતદારોએ કહ્યું કે ભાજપમાં આંતરિક ઝઘડો વધુ છે, જ્યારે 36.7 ટકા મતદારોએ કહ્યું કે કોંગ્રેસમાં આંતરિક ઝઘડો વધુ છે.
હિન્દુ મતદારોમાં, 30.71 ટકાએ કહ્યું કે તેઓ રામ મંદિરના ઉદ્ઘાટન પછી તરત જ અયોધ્યાની મુલાકાત લેશે, જ્યારે 41.03 ટકા મતદારોએ કહ્યું કે ‘પછીથી’.
47.45 ટકા મતદારોએ કહ્યું કે પીએમ નરેન્દ્ર મોદીએ ઈઝરાયેલને સમર્થન આપવું જોઈએ, જ્યારે 35 ટકા મતદારોએ કહ્યું કે પીએમ મોદીએ પેલેસ્ટાઈનને સમર્થન આપવું જોઈએ. 17.55 ટકા લોકોએ કહ્યું કે તેઓ આ મુદ્દે કંઈ કહી શકતા નથી.
51 ટકા મતદારોએ કહ્યું કે ઇઝરાયેલ સાચો છે, જ્યારે 38.39 ટકા મતદારોએ કહ્યું કે પેલેસ્ટાઇન સાચો છે. 10.61 ટકા મતદારોએ કહ્યું, કહી ન શકાય.
હિંદુ મતદારોમાં, 66.9 ટકા મતદારોએ કહ્યું કે તેઓ ઇઝરાયલ પર હમાસના હુમલાનો ભયાનક વીડિયો જોયા પછી ડરી ગયા હતા, જ્યારે 23.45 ટકા મતદારોએ ‘ના’ કહ્યું હતું.
