જે ડી વેન્સે પરિવાર સાથે કર્યા અક્ષરધામ મંદિરના દર્શન, ગેસ્ટ બુકમાં ભારતના કર્યા વખાણ

અમેરિકાના ઉપરાષ્ટ્રપતિ જેડી વેન્સે તેમની પત્ની ઉષા ચિલુકુરી અને ત્રણ બાળકો સાથે દિલ્હીના અક્ષરધામ મંદિરની મુલાકાત લીધી હતી. વેન્સ અને તેમનો પરિવાર અક્ષરધામ મંદિરમાં લગભગ ચાર કલાક રોકાયો હતો. તેમના ત્રણ બાળકો ઇવાન, વિવેક અને મીરાબેલ પરંપરાગત ભારતીય પોશાક પહેરેલા હતા. અમેરિકાના ઉપરાષ્ટ્રપતિએ મંદિરની ગેસ્ટબુકમાં લખ્યું, "આ સુંદર સ્થળે મારું અને મારા પરિવારનું સ્વાગત કરવા બદલ હું આપ સૌનો આભાર માનું છું. આટલું સુંદર મંદિર બનાવવા બદલ ભારત ખૂબ જ શ્રેયને પાત્ર છે. ખાસ કરીને મારા બાળકોને તે ખૂબ ગમ્યું. ભગવાન તમને આશીર્વાદ આપે."

પરંપરાગત સ્વાગત

વેન્સ પરિવારે મંદિરના ભવ્ય પ્રાંગણની બહાર હાજર કેમેરામેન સાથે ફોટોગ્રાફી કરી. મંદિરના એક પૂજારીએ પીટીઆઈને જણાવ્યું, "તેમનું પરંપરાગત રીતે સ્વાગત કરવામાં આવ્યું, ત્યારબાદ તેમણે દર્શન કર્યા. પરિવારને લાકડાનો કોતરેલો હાથી, અક્ષરધામ મંદિરનું મોડેલ અને બાળકોના પુસ્તકો ભેટમાં આપવામાં આવ્યા હતા.

ઉપરાષ્ટ્રપતિને કોતરણી ગમી

મંદિરના સ્વયંસેવક મીરા સોંડાગરે કહ્યું કે ઉપરાષ્ટ્રપતિને ખાસ કરીને ગજેન્દ્ર પીઠ પસંદ આવ્યું. તેઓ તેની જટિલ કોતરણીથી ખૂબ પ્રભાવિત થયા. ગજેન્દ્ર પીઠ પર હાથીઓ કોતરેલા છે જે શક્તિ અને બુદ્ધિનું પ્રતીક છે. તેમણે કહ્યું, "તેમને આખા અક્ષરધામનો પ્રવાસ કરાવવામાં આવ્યો હતો અને તેઓ આ અનુભવથી ખૂબ પ્રભાવિત થયા હતા. તેમણે (વેન્સે) કહ્યું કે અહીં આવીને તેમને શાંતિ મળી."

અક્ષરધામ મંદિરના સત્તાવાર X એકાઉન્ટ પર વેન્સની મંદિરની મુલાકાત અંગેની એક પોસ્ટ પણ શેર કરવામાં આવી હતી. પોસ્ટમાં કહેવામાં આવ્યું છે, "અમેરિકાના ઉપરાષ્ટ્રપતિ જેડી વેન્સ, સેકન્ડ લેડી ઉષા વેન્સ અને તેમના બાળકોએ દિલ્હીમાં સ્વામિનારાયણ અક્ષરધામની મુલાકાત લીધી હતી". અહીં તેમણે મંદિરની ભવ્ય કલા, સ્થાપત્ય અને શ્રદ્ધા, પરિવાર અને સંવાદિતાના શાશ્વત મૂલ્યોનો અનુભવ કર્યો."