ટેરિફ પાવરના દમ પર ભારત-પાકિસ્તાન વચ્ચે યુદ્ધવિરામ કરાવ્યું, ટ્રમ્પના અધિકારીઓની કોર્ટમાં દલીલ

ભારત અને પાકિસ્તાન વચ્ચે યુદ્ધવિરામ થયા પછી સૌથી વધુ ચર્ચામાં રહેનાર વ્યક્તિ અમેરિકાના રાષ્ટ્રપતિ ડોનાલ્ડ ટ્રમ્પ છે. તેમના તરફથી સતત કહેવામાં આવી રહ્યું છે કે ભારત અને પાકિસ્તાન વચ્ચેનો તણાવ તેમણે જ ઓછો કરાવ્યો હતો, તેઓ જ બંને દેશોને વેપાર દ્વારા વાટાઘાટોના ટેબલ પર લાવ્યા હતા. હવે રાષ્ટ્રપતિ ટ્રમ્પના આ દાવાઓ અમેરિકન કોર્ટમાં પણ વારંવાર કરવામાં આવ્યા છે.

અમેરિકન ઉદ્યોગપતિઓના એક જૂથે ટ્રમ્પ વહીવટીતંત્રની ટેરિફ નીતિ સામે અરજી દાખલ કરી છે. તે અરજી પછી કોર્ટે નક્કી કરવાનું છે કે શું ટ્રમ્પ રાષ્ટ્રીય કટોકટીના નામે ભારે ટેરિફને યોગ્ય ઠેરવી શકે છે? હવે તે સુનાવણી દરમિયાન એક સમય એવો આવ્યો જ્યારે ટ્રમ્પના અધિકારીઓએ ભારત અને પાકિસ્તાનનો ઉલ્લેખ કર્યો. તેમના તરફથી એવું પણ કહેવામાં આવ્યું હતું કે તેઓ વેપારના આધારે બંને દેશો વચ્ચે યુદ્ધવિરામ લાવ્યા હતા.

આ પણ વાંચો: ગુજરાતના 23 જિલ્લાઓમાં વીજળીના કડાકાભડાકા સાથે વાવાઝોડાનું ઓરેંજ એલર્ટ

હવે રાષ્ટ્રપતિ ટ્રમ્પે ચોક્કસપણે ઘણી વખત આવા દાવા કર્યા છે, આ અંગે તેમના નિવેદનો પણ બદલાતા રહ્યા છે. પરંતુ ભારતે પોતાનું વલણ સ્પષ્ટ કરી દીધું છે. સ્પષ્ટપણે કહેવામાં આવ્યું છે કે જમ્મુ અને કાશ્મીરના મુદ્દા પર કોઈપણ ત્રીજા પક્ષનો હસ્તક્ષેપ હોઈ શકે નહીં. યુદ્ધવિરામ અંગે વિદેશ મંત્રી એસ જયશંકરે પણ સ્પષ્ટપણે કહ્યું છે કે ભારતના ડીજીએમઓને પાકિસ્તાન તરફથી ફોન આવ્યો હતો અને તે પછી જ યુદ્ધવિરામ પર સંમતિ થઈ હતી.

આમ તો થોડા દિવસ પહેલા રાષ્ટ્રપતિ ટ્રમ્પનો સ્વર થોડો નરમ પડ્યો હતો. તેમણે કહ્યું હતું કે હું એવું કહેવા માંગતો નથી કે મેં તે કરાવ્યું, પરંતુ હા મેં ચોક્કસ મદદ કરી હતી. ભારત અને પાકિસ્તાન વચ્ચે ચાલી રહેલ તણાવ વધુ ખરાબ થઈ રહ્યો હતો, તમે બધા જોઈ રહ્યા હતા કે અચાનક અલગ-અલગ મિસાઇલો છોડવામાં આવી રહી હતી.

હું નથી ઈચ્છતો કે હું અહીંથી જાઉ અને બે દિવસ પછી ખબર પડે કે ભારત અને પાકિસ્તાન વચ્ચે કંઈ નક્કી થયું નથી. પરંતુ હાલ પૂરતું એવું લાગે છે કે તે થઈ ગયું છે. મેં બંને દેશો સાથે વેપાર વિશે વાત કરી હતી, કહ્યું હતું કે ચાલો યુદ્ધને બદલે વેપાર કરીએ. પાકિસ્તાન ખૂબ ખુશ હતું, ભારત પણ ખૂબ ખુશ હતું.