આકાશમાં સીધી રેખામાં આવશે 7 ગ્રહ, જોવાનું ચુક્યા તો 2040 સુધી જોવી પડશે રાહ

Planetary Parade 2025: અવકાશમાં ઘણીવાર અદ્ભુત ખગોળીય ઘટનાઓ જોવા મળે છે. ખગોળીય ઘટનાઓમાં રસ ધરાવતા લોકો માટે આવનારા દિવસો ખૂબ જ ખાસ રહેવાના છે. ખરેખરમાં એક રેખામાં સાત ગ્રહો દેખાવાના છે. આ સમય દરમિયાન સાતેય ગ્રહો એટલે કે શનિ, બુધ, નેપ્ચ્યુન, શુક્ર, યુરેનસ, ગુરુ અને મંગળ એક સીધી રેખામાં એકસાથે જોવા મળશે. વૈજ્ઞાનિકોએ આ ખગોળીય ઘટનાને એક દુર્લભ ગ્રહ સંયોગ ગણાવ્યો છે.

ખગોળીય ઘટનાઓમાં રસ ધરાવતા લોકો અને સામાન્ય લોકો માટે આ એક અદ્ભુત ઘટના હશે. આ ખાસ છે કારણ કે સાત ગ્રહો એકસાથે જોવા મળે તે ખૂબ જ દુર્લભ છે. સામાન્ય રીતે એક જ સમયે ઘણા ગ્રહો સૂર્યની એક જ બાજુ પર હોય છે પરંતુ બધા ગ્રહો એક જ સમયે સીધી રેખામાં હોય તેવું ભાગ્યે જ બનતું હોય છે.

એક જ સમયે થોડા ગ્રહો એક જ રેખામાં હોય તે અસામાન્ય નથી, પરંતુ બધા ગ્રહો એક સીધી રેખામાં હોય તે ચોક્કસપણે એક દુર્લભ ઘટના છે. આ અદ્ભુત ખગોળીય ઘટનાને પ્લેનેટરી એલાઈનમેન્ટ કહેવામાં આવે છે. 28 ફેબ્રુઆરી, 2025 ના રોજ સૌરમંડળના તમામ સાત ગ્રહો રાત્રે એકસાથે દેખાશે.

આ પણ વાંચો: શું જાણી જોઈને સુનિતા વિલિયમ્સને સ્પેસમાંથી પરત નથી લવાઈ? ડોનાલ્ડ ટ્રમ્પનો મોટો ઘટસ્ફોટ

બધા ગ્રહો સૂર્યની આસપાસ અલગ-અલગ ભ્રમણકક્ષામાં ફરે છે પરંતુ ગ્રહોની ભ્રમણકક્ષા અલગ-અલગ હોય છે, જેના કારણે તેઓ સીધી રેખામાં દેખાતા નથી. જોકે જ્યારે પૃથ્વી સહિત અન્ય ગ્રહો સૂર્યની એક બાજુ આવે છે, ત્યારે તેઓ આકાશમાં સીધી રેખામાં દેખાય છે.

આ કાર્યક્રમ જાન્યુઆરીથી ચાલી રહ્યો છે અને 8 માર્ચ સુધી ચાલુ રહેશે. જોકે 28 ફેબ્રુઆરીએ બધા સાત ગ્રહો એકસાથે દેખાશે. વૈજ્ઞાનિકો કહે છે કે આ ઘટના ખૂબ જ દુર્લભ છે અને આગામી 15 વર્ષ સુધી ફરી જોવા મળશે નહીં. આ પછી ગ્રહોની આવી પરેડ ફક્ત 2040 માં જ જોઈ શકાશે.

કેવી રીતે જોવા મળશે?

નિષ્ણાતો કહે છે કે ગ્રહોની પરેડ જોવા માટે પ્રકાશથી દૂર ખુલ્લા મેદાનમાં જવું સારું રહેશે. જો હવામાન સ્વચ્છ હોય તો યુરેનસ અને નેપ્ચ્યુન સિવાયના બધા ગ્રહો નરી આંખે જોઈ શકાય છે. જોકે યુરેનસ અને નેપ્ચ્યુન જોવા માટે દૂરબીનની જરૂર પડશે. નિષ્ણાતોના મતે મંગળ પૂર્વમાં, ગુરુ અને યુરેનસ દક્ષિણ-પૂર્વમાં, જ્યારે શુક્ર, નેપ્ચ્યુન અને શનિ પશ્ચિમમાં દેખાશે.