કાર ચાલકે અચાનક દરવાજો ખોલ્યો, સ્કૂટર પર જઈ રહેલો ક્રિકેટર પડ્યો અને થયું દર્દનાક મૃત્યુ

જમ્મુ અને કાશ્મીરના પૂંછ જિલ્લાના ઉભરતા ક્રિકેટર ફરીદ હુસૈનનું 20 ઓગસ્ટના રોજ એક માર્ગ અકસ્માતમાં મૃત્યુ થયું, જેનો વીડિયો ઇન્ટરનેટ પર વાયરલ થઈ રહ્યો છે. આ ક્રિકેટરના મૃત્યુનો જે વીડિયો વાયરલ થઈ રહ્યો છે તે ખૂબ જ પીડાદાયક છે જેમાં ક્રિકેટર પડી જવાથી ઘટનાસ્થળે જ મૃત્યુ પામ્યો.

ઉભરતા ક્રિકેટરનું દર્દનાક મૃત્યુ થયું

ઇન્ડિયા ટુડેના અહેવાલ મુજબ, આ અકસ્માત 20 ઓગસ્ટના રોજ થયો હતો અને આ અકસ્માતનો વીડિયો સામે આવ્યા બાદ ક્રિકેટ જગતમાં શોકનો માહોલ છે. ફરીદ હુસૈનને જમ્મુ અને કાશ્મીરના આશાસ્પદ ક્રિકેટર તરીકે જોવામાં આવી રહ્યો હતો. તેમના અકસ્માતના વીડિયોએ ઇન્ટરનેટ પર તેમજ સ્થાનિક સમુદાયને ચોંકાવી દીધા છે.

આ પણ વાંચો: પહેલી જ મેચમાં કૂપર કોનોલી બન્યો ઓસ્ટ્રેલિયાનો હીરો, 20 વર્ષ જૂનો રેકોર્ડ તોડ્યો

જે વીડિયો સામે આવ્યો છે તેમાં જોવા મળે છે કે ફરીદ હુસૈન તેના સ્કૂટર પર જઈ રહ્યો હતો ત્યારે એક વ્યક્તિએ અચાનક રસ્તાની બાજુમાં પાર્ક કરેલી કારનો દરવાજો ખોલ્યો. દરવાજો અચાનક ખુલવાથી ફરીદનું સ્કૂટર પડી ગયું અને તે ગંભીર રીતે ઘાયલ થયો અને બેભાન થઈ ગયો.

સ્થાનિક લોકો તેને નજીકની હોસ્પિટલમાં લઈ ગયા પરંતુ ડોકટરો તેને બચાવી શક્યા નહીં અને શનિવારે તેનું મૃત્યુ થયું. પોલીસ અધિકારીઓએ અકસ્માતની તપાસ શરૂ કરી દીધી છે અને સીસીટીવી ફૂટેજની તપાસ કરી રહ્યા છે જે અકસ્માતનું કારણ સ્પષ્ટપણે દર્શાવે છે.