ટીમ ઈન્ડિયાના ફાસ્ટ બોલર મોહમ્મદ શમીની પત્ની હસીન જહાંએ સુપ્રીમ કોર્ટનો દરવાજો ખખડાવ્યો છે. તેણે પોતાના અને પોતાની પુત્રી માટે વર્તમાન ચાર લાખ રૂપિયાને બદલે દસ લાખ રૂપિયા માસિક ભરણપોષણની માંગણી કરી છે. કાર્યવાહી કરતા સુપ્રીમ કોર્ટે શમી અને પશ્ચિમ બંગાળ સરકારને નોટિસ ફટકારી છે. હસીન જહાં ઘણા વર્ષોથી મોહમ્મદ શમીથી અલગ રહે છે, અને તેમની પુત્રી પણ તેની સાથે રહે છે.
હસીન જહાંએ કોલકાતા હાઈકોર્ટના અગાઉના નિર્ણયને પડકાર્યો છે, જેમાં તેણીને દર મહિને 1.5 લાખ રૂપિયા અને તેની પુત્રીની સંભાળ માટે 2.5 લાખ રૂપિયા ભરણપોષણનો આદેશ આપવામાં આવ્યો હતો. તેણી દલીલ કરી છે કે આ રકમ અપૂરતી છે અને તેને વધારીને દસ લાખ રૂપિયા કરવી જોઈએ. જહાંની અપીલ જસ્ટિસ મનોજ મિશ્રા અને ઉજ્જલ ભૂયાનની બેન્ચ સમક્ષ સૂચિબદ્ધ કરવામાં આવી હતી. બેન્ચે પ્રશ્ન કર્યો હતો કે શું હાઈકોર્ટ દ્વારા આદેશ કરાયેલા ચાર લાખ રૂપિયા તેના માટે પૂરતા નથી.
આ પણ વાંચો: જાહેર સ્થળોએથી રખડતા કૂતરાઓને દૂર કરો અને તેમને આશ્રયસ્થાનોમાં સ્થાનાંતરિત કરો: સુપ્રીમ કોર્ટ
અરજીમાં હસીન જહાંએ દલીલ કરી હતી કે શમીની આવક અને જીવનશૈલીને ધ્યાનમાં રાખીને આ રકમ અપૂરતી છે, અને કોર્ટને ભરણપોષણ વધારવાની વિનંતી કરી હતી. જહાંના વકીલે કોર્ટમાં દલીલ કરી હતી કે તેનો પતિ (મોહમ્મદ શમી) ઘણા પૈસા કમાય છે. સોગંદનામાના આધારે તે સેંકડો કરોડની મિલકત ધરાવે છે, લક્ઝરી કાર ધરાવે છે, વારંવાર વિદેશ પ્રવાસ કરે છે અને વૈભવી જીવનશૈલી જીવે છે.
તમને જણાવી દઈએ કે, શમી અને તેની પત્ની હસીન જહાં વચ્ચે 2018 થી વિવાદ ચાલી રહ્યો છે. જહાંએ શમી પર ઘરેલુ હિંસા અને દહેજ ઉત્પીડન સહિતના વિવિધ ગુનાઓનો આરોપ લગાવ્યો છે. દરમિયાન મોહમ્મદ શમી દક્ષિણ આફ્રિકા સામે તાજેતરમાં જાહેર કરાયેલ ટીમ ઈન્ડિયાની ટેસ્ટ ટીમમાં પાછો ફર્યો નથી. તેણે તાજેતરમાં બંગાળ માટે ત્રણ રણજી ટ્રોફી મેચમાં સારું પ્રદર્શન કર્યું હતું, પરંતુ ફરી એકવાર ટેસ્ટ ટીમમાં સ્થાન મેળવવામાં નિષ્ફળ રહ્યો છે.
