ટી-20 વર્લ્ડ કપમાં ભારત-પાકિસ્તાન વચ્ચે થયા છે 6 મુકાબલા, આવો છે ટીમ ઇન્ડિયાનો રેકોર્ડ

T20 World Cup 2022, IND vs PAK: ટી-20 વર્લ્ડ કપમાં ભારત અને પાકિસ્તાનના મુકાબલાને હવે ગણતરીના દિવસોની વાર છે. બન્ને ટીમો 23 ઓક્ટોબરે મેલબોર્ન ક્રિકેટ ગ્રાઉન્ડ પર બપોરે 1.30 કલાકે મેચ રમશે. ટી-20 વર્લ્ડ કપમાં ભારત અને પાકિસ્તાન વચ્ચે આ સાતમો મુકાબલો થશે. આ પહેલા 6 મુકાબલા થયા છે. જેમાં ભારતનો પાંચ મેચમાં વિજય થયો છે. જ્યારે પાકિસ્તાનનો એક મેચમાં વિજય થયો છે. અમે ટી-20 વર્લ્ડ કપમાં ભારત અને પાકિસ્તાન વચ્ચેના મુકાબલા વિશે જણાવી રહ્યા છીએ.

પ્રથમ મુકાબલો, 2007

ભારત અને પાકિસ્તાન વચ્ચે ટી-20 વર્લ્ડ કપમાં પ્રથમ મેચ 2007માં રમાઇ હતી. આ ટી-20નો પ્રથમ વર્લ્ડ કપ હતો. ગ્રુપ સ્ટેજમાં ભારત-પાકિસ્તાન વચ્ચે થયેલો પ્રથમ મુકાબલો જ રોમાંચક રહેતા ટાઇ રહ્યો હતો. ભારતે 20 ઓવરમાં 9 વિકેટે 141 રન બનાવ્યા હતા. જવાબમાં પાકિસ્તાન 20 ઓવરમાં 7 વિકેટે 141 રન બનાવતા મેચ ટાઇ પડી હતી. આ પછી બોલઆઉટથી પરિણામ નક્કી કરાયું હતું. ભારતે 3-0થી બોલઆઉટ કરીને મેચ જીતી લીધી હતી.

બીજો મુકાબલો, 2007 વર્લ્ડ કપની ફાઇનલ

2007માં ટી-20 વર્લ્ડ કપની ફાઇનલમાં ફરી એક વખત ભારત-પાકિસ્તાન ટકરાયા હતા. ભારતનો અંતિમ ઓવરમાં 5 રને રોમાંચક વિજય થયો હતો. ભારતે 20 ઓવરમાં 5 વિકેટે 157 રન બનાવ્યા હતા. જવાબમાં પાકિસ્તાન 19.3 ઓવરમાં 152 રનમાં ઓલઆઉટ થઇ ગયું હતું. પાકિસ્તાનને હરાવી ભારતે ટી-20નો પ્રથમ વર્લ્ડ કપ જીતી લીધો હતો.

આ પણ વાંચો - ભારત-પાકિસ્તાન વચ્ચેની મેચની મજા વરસાદ બગાડશે? મેલબોર્નમાં 23 ઓક્ટોબરે કેવું રહેશે મોસમ, જાણો

ત્રીજો મુકાબલો, 2012

ટી-20 વર્લ્ડ કપ 2012માં 30 સપ્ટેમ્બરે ભારત અને પાકિસ્તાન વચ્ચે સુપર-8ના રાઉન્ડમાં મુકાબલો થયો હતો. પાકિસ્તાનની ટીમ 19.4 ઓવરમાં128 રનમાં ઓલઆઉટ થઇ ગઇ હતી. જવાબમાં ભારતે 17 ઓવરમાં 2 વિકેટ ગુમાવી પડકાર મેળવી લીધો હતો. વિરાટ કોહલીએ 61 બોલમાં 8 ફોર અને 2 સિક્સરની મદદથી અણનમ 78 રન બનાવ્યા હતા.

ચોથો મુકાબલો, 2014

2014માં 21મી માર્ચે ભારત પાકિસ્તાન વચ્ચે ટી-20 વર્લ્ડ કપનો ચોથો મુકાબલો રમાયો હતો. પાકિસ્તાન 20 ઓવરમાં 7 વિકેટે 130 રન જ બનાવી શક્યું હતું. જવાબમાં ભારતે 18.3 ઓવરમાં 3 વિકેટ ગુમાવી 131 રન બનાવી લીધા હતા.

પાંચમો મુકાબલો, 2016

19 માર્ચ 2016ના રોજ બન્ને વચ્ચે ટી-20 વર્લ્ડ કપનો પાંચમો મુકાબલો થયો હતો. વરસાદના કારણે મેચ 18-18 ઓવરની કરવામાં આવી હતી. પાકિસ્તાને 18 ઓવરમાં 5 વિકેટે 118 રન બનાવ્યા હતા. જવાબમાં ભારતે 15.5 ઓવરમાં 4 વિકેટે 119 રન બનાવી લીધા હતા. વિરાટ કોહલીએ 37 બોલમાં 7 ફોર, 1 સિક્સરની મદદથી અણનમ 55 રન બનાવ્યા હતા.

આ પણ વાંચો - T20 World Cup: ઓસ્ટ્રેલિયાએ સ્લો ઓવર રેટથી બચવા અપનાવ્યો આવો જુગાડ

છઠ્ઠો મુકાબલો, 2021

24 ઓક્ટોબર 2021ના રોજ બન્ને ટીમો ગ્રુપ સ્ટેજમાં ટકરાઇ હતી. આ મેચમાં પાકિસ્તાનનો 10 વિકેટે વિજય થયો હતો. ટી-20 વર્લ્ડ કપમાં પ્રથમ વખત પાકિસ્તાન ભારત સામે જીતવા સફળ રહ્યું હતું. ભારતીય ટીમ 20 ઓવરમાં 7 વિકેટે 151 રન બનાવી શકી હતી. જવાબમાં પાકિસ્તાને 17.5 ઓવરમાં વિના વિકેટે 152 રન બનાવી લીધા હતા. મોહમ્મદ રિઝવાને 79 અને બાબર આઝમે 68 રન બનાવ્યા હતા.